وصية شهيد إلى امه
ان مت قولوا لامي
مات تبكيش و لا تشيلي همي
ابنك مات بطل و مش خايف
بس و حياتي عندك يا امي
ضحكتك ما تفارق الشفايف
افرحي و مش عاوز قلبك ينجزع
و قولى ابني مات بطل و جدع
لا خاف يوم و لا قلبه وقع
ابنك مات بطل وجدع
و امه لما اوام جالها الخبر
زغردت و النور في وشها انتشر
و ما فكرتش في ضناها اللي مات
و قالت المهم جيشنا انتصر
صحيح سبنا من غير عائل
ساب لي بطة و هنا و وائل
عيال لسه قطط بتحبي
بس كفاية أنه مات راجل
كفاية أنه مات علي الجبهة
و دمه الطاهر حضن ترابها
و كفاية انه مات عشان مصر تعيش
هو يا ولاد خسارة في مصر شبابها
لكن بقوله نام يا ضنايا
و اخوك يكمل الحكاية
حكاية ابطال شجعان ما هابوا الموت
ماتوا عشان مصر تبقي مرفوعة الراية
يحي أبو السعود المحامي
تعليقات
إرسال تعليق